දැහැන

දියට බැස

දිය කෙළින 

තුරු වදුළ....

නිසලව නිහඬව

ගැඹුරු නින්දක

ගං ඉවුර...

 

.

බලාපොරොත්තු

 

මුදාහළ සලුව 

ඉගිකරයි 

වස්සානයක පෙරමග....

ප්‍රාර්ථනා

හද අසපු ද්වාරය වෙත  ඇදෙමී

දේදුනු පැහැ තවරා පේවෙමී

ප්‍රාර්ථනා පුසුඹ සුසුමට ඔබ්බවමී

සෝක දොම්නස් මිහිදන් කරමී

කුසුමක්ව පිපෙමී

කුසුමක්ව පරවෙමී

කුසුමක්ව මලගම් යමී

 

ලුනු රසයි ජීවිතය..

රාස්සීගේ අව්වය

රන්වන් රිදී රේඛාය

ගව්වක් දුරින් ක්ෂිතිජය

ඇතුවත් බැරිය

නැතුවත් බැරිය

ලුනු රසයි ජීවිතය..

පුත්තලම |16.09.2020

 

අතර මඟ මතක

 

කතරක මැද තනිවී යන අතර මඟ

සුළගත් හැරගියා මඟ තනිකර මතක

අවරට හැරෙත් ඉර එලියත් නිවාගෙන

කලුවර අවුත් මඟ ඇහිරුව හැටි මතක

දියවර සිදී ගිය වැව් ඉවුරකින් එන

කාෂ්ඨකේ ඉගියක් දැනුනා සිතට

අදුරත් කපා අතපොවනා වෙලාවක

වරා මල් පොකුරු ගතු කීවයි සිතට

එලියක් නැතත් ළග පාතක පෙනෙන දුර

පොඩි තරු පේනවා දුර අහසේ කොනක

යන මඟ නොදැන උන්නත් මේ සසර මඟ

නවතින තැනක එලියක් මතුවින මෙලෙස

පාරමිතා...

මොහොතකට නතරවුන 

සිතුවිලි ගංගාව

ශූන්‍යත්වය සිහිකරයි...

පාරමිතාවක්වෙමි...

දිගු හුස්ම හෙලමි

හුස්ම අතර විරාම නැතිවම 

මමත්වය අත්හරිමි....

පානාතිපාතා

පානාතිපාතා......

සිල් රකින්නත් ජීවත්වෙන්න එපැයි......!

දියවුන සිහින

මා උන්නු නගරයේ

හවස එබෙන්නටත්  කළියෙන්ම

නැනෝ ලයිට් එලි දැල්වෙනවා

විදි පුරාම මඟ දිගට.....

 

වැස්ස දවසකට කළින්

මෙරුවන් මතුවෙනව 

ඉඩක් තියෙන තැනකින් 

පොළොවෙන් තවමත් 

තුරුලු කරගෙන

සමනල් සිහින..... 

රැය පුරාවට රැවටුන

මෙරුවන් තැන තැන 

ආත්මය දියකරමින් උන්නා 

මඟ දිගටම 

නැනෝ ලයිට් එලි පාමුල....

ඇවිදිනව මම ම

විදි දිගේ අහුලමින් මග දිගට

නැනෝ ලයිට් එලි යට 

දියවුන සිහින...

ගැලපීම

එයා

සුදුයි

කොටයි

මහතයි

ලස්සනයි

නාගරිකයි

එයා බලන්නෙ ඉංග්‍රිසි ච්ත්තරපට

අහන්නෙ සාස්ත්‍රීය ගීත

මම

කලුයි

උසයි

කෙට්ටුයි

කැතයි

ග්‍රාමීයයි

මමනම් බලන්නෙ සිංහල ච්ත්තරපට

අහන්නෙ සරල ගීත

ඒත් අපි දෙන්නම

සිංහල බෞද්ධ

වෙජිටේරියන්ලානෙ.....